Aðilar gerðu tímabundinn leigusamning frá 5. desember 2021 til 5. júní 2022. Um var að ræða endurnýjun á fyrri leigusamningi aðila. Ágreiningur snýr að endurgreiðslu tryggingarfjár. Leigutakar höfðu lagt fram 630.000 kr. í tryggingarfé. Fram kemur að 255.200 kr. hafði verið haldið eftir vegna leiguvanskila. 374.800 kr. hafi verið haldið eftir til að mæta kostnaði vegna skemmda sem höfðu orðið á hinu leigða á leigutímanum. Ekki var uppi ágreiningur varðandi 255.200 kr. sem haldið hafi verið eftir vegna leiguvanskila.

Leigutaki kveðst hafa fengið þær upplýsingar frá leigusala við lok leigutímans að það væri eitthvað sem þyrfti að laga. Hafi annar leigutakinn lagað það sem hann taldi sig geta lagað en beðið leigusala um að draga frá tryggingarfénu þá hluti er hann gat ekki lagað. Komust síðan aðilar að samkomulagi um að eftirstöðvar tryggingarfjár yrði endurgreiddar í september. Engin endurgreiðsla hafi þó átt sér stað og hafi leigusali tjáð leigutaka að hann hafi þurft að nota eftirstöðvar að frádregnum leiguvanskilum eða 400.000 kr. í greiðslu við viðgerð við húsið.

Kærunefnd húsamála komst að þeirri niðurstöðu að frá því að leigusala var ljóst að ágreiningur væri um bótaskyldu leigutaka þá bar honum að bera þann ágreining undir kærunefnd húsamála innan fjögurra vikna sbr. 5. mgr. 40. gr. Þar sem að svo var ekki gert var leigusala gert að endurgreiða tryggingarfé að fjárhæð 374.800 kr.