Aðilar gerðu tímabundinn leigusamning frá 1. ágúst 2019 til 2. apríl 2021 og var leiga ákveðin 190.000 kr. á mánuði. Leigjandi krafðist endurgreiðslu á tryggingafé sem hann hafði greitt við upphaf leigutíma að fjárhæð 380.000 kr. Leigusali hélt því fram að leigjandi hefði ekki greitt leigu fyrir október og nóvember 2019 og hefði leigusali því ráðstafað tryggingafénu til greiðslu leigu vegna þeirra mánaða. Leigjandi hélt því hins vegar fram að hann hafi greitt leigu fyrir þessa tvo mánuði með reiðufé.

Kærunefnd taldi engin gögn styðja fullyrðingu leigjanda um að hann hafi greitt leiguna með reiðufé. Þá hafi leigusali lagt fram bankayfirlit sem sýndi leigugreiðslur leigjanda inn á reikning hans en engar færslur var þar að finna vegna október og nóvember 2019.

Niðurstaða: Fallist var á að leigusala hafi verið heimilt að ráðstafa tryggingarfénu til greiðslu leigu vegna október og nóvember 2019.