Um húsaleigumál
Lög
Í málefnum er varða húsaleigu reynir mest á húsaleigulög og lög um fjöleignarhús. Í húsaleigulögunum er kveðið á um réttindi og skyldur aðila í leigusambandi en í lögum um fjöleignarhús er að finna reglur um réttindi og skyldur eiganda í fjöleignarhúsi.
Úttekt á íbúðarhúsnæði
Samkvæmt ákvæði húsaleigulaga skulu aðilar leigusambands gera úttekt á ástandi hins leigða húsnæðis áður en afhending fer fram og við lok leigutíma. Úttektina geta leigjandi og leigusali framkvæmt saman með því að fylla inn í úttektarskjalið og staðfesta með undirskrift sinni. Óski annar aðili eftir því að óháður úttektaraðil annist úttektina skiptist kostnaður að jöfnu á milli aðila.
Húsaleigusamningar
Fram kemur í húsaleigulögunum að leigusamningur skuli vera skriflegur og í 6. gr. laganna er upptalning á hvaða upplýsingar skulu koma fram í leigusamningi. Þar ber helst að nefna lýsingu á hinu leigða, hvort samningurinn sé tímabundinn eða ótímabundinn og fjárhæð leigu og hvort hún taki breytingum á leigutíma. Tekið skal fram að hafi ekki verið gerður skriflegur leigusamningur telst vera kominn á ótímabundinn leigusamningur og gilda öll ákvæði húsaleigulaganna um réttarsamband þeirra.
Sýnishorn
Í húsaleigulögunum er krafa um að samskipti milli leigjanda og leigusala séu skrifleg í vissum tilfellum ber þar helst að nefna uppsögn, greiðsluáskorun, yfirlýsing um riftun sem og allar viðhaldsbeiðnir. Samskiptin geta verið í rafrænu formi til dæmis með tölvupósti eða smáskilaboðum, gott er að hafa í huga að hafa samskiptin skýr og skilmerkileg.
Húsnæðisbætur
Húsnæðisbætur eru bætur sem ætlaðar eru til að aðstoða þá sem leigja íbúðarhúsnæði. Húsnæðis- og mannvirkjastofnun annast framkvæmd laga nr. 75/2016 um húsnæðisbætur og tekur ákvarðanir um rétt til húsnæðisbóta.
